TickTick News Tamil

தருமபுரி மக்களவைத் தொகுதியில் 10 வாக்குச் சாவடிகளில் மறுவாக்குப் பதிவு நடத்தக் கோரி, திமுக வேட்பாளர் டிஎன்வி எஸ்.செந்தில்குமார் மாவட்ட தேர்தல் அலுவலர் சு.மலர்விழியிடம் வெள்ளிக்கிழமை மனு அளித்தார். தருமபுரி செட்டிகரை அரசு பொறியியல் கல்லூரியில் உள்ள வாக்கு எண்ணிக்கை மையத்தில், மக்களவைத் தொகுதி திமுக வேட்பாளர் டிஎன்வி எஸ்.செந்தில்குமார் கோரிக்கை மனுவை மாவட்ட தேர்தல் அலுவலர், ஆட்சியருமான சு.மலர்விழியிடம் அளித்தார். இதைத் தொடர்ந்து, அவர் செய்தியாளர்களிடம் கூறியது: தருமபுரி மக்களவைத் தொகுதிக்குள்பட்ட பாப்பிரெட்டிப்பட்டி பேரவைத் தொகுதியைச் சேர்ந்த நத்தமேடு கிராமத்தில் அமைக்கப்பட்ட வாக்குச் சாவடி எண்: 192, 193, 194 மற்றும் 195, கேத்திரெட்டிப்பட்டி வாக்குச் சாவடி எண்: 186, 187, ஜாலியூர் வாக்குச் சாவடி எண்: 196,197 மற்றும் அய்யம்பட்டி வாக்குச் சாவடி எண்: 181, 182 ஆகிய 10 வாக்குச் சாவடிகளை குறிப்பிட்ட கட்சியினர் கைப்பற்றி, பிற சமுதாயத்தினருக்கு வாக்களிக்க வாய்ப்பு அளிக்காமல் அவர்களே வாக்களித்துள்ளனர்.
இந்த வாக்குச் சாவடிகளில் கடந்த காலங்களிலும் இதுபோல நடந்துள்ளது. இதுகுறித்து முன்கூட்டியே மாவட்ட தேர்தல் அலுவலரிடம் புகார் அளித்துள்ளோம். முன்னெச்சரிக்கையாக உரிய பாதுகாப்பு நடவடிக்கைகள் எடுக்கப்பட்டிருந்தால், இதுபோல நிகழ்ந்திருக்காது. எனவே, ஜனநாயகத்தில் அனைத்து சமுதாயத்தினரும் வாக்களிக்கும் உரிமையை நிலைநாட்டி, அந்த வாக்குச் சாவடிகளில் மறுவாக்குப் பதிவு நடத்த வேண்டும். இது தொடர்பாக திமுக தலைமை வழிகாட்டுதல் பேரில் சட்ட ரீதியான நடவடிக்கை எடுப்போம் என்றார்.