Categories
தமிழகம்

எங்க எல்லை இல்லை… ஆடு திருட்டில் அலைக்கழித்த போலீசார்

மணப்பாறை: எங்க எல்லை இல்லை… அலைக்கழித்த போலீசாரால் நொந்து போய் விட்டார் ஆட்டை தொலைத்தவர்கள். என்ன விஷயம் தெரியுங்களா?

திருச்சி மாவட்டம், மணப்பாறை அருகே கரட்டுப்பட்டி, வடதோட்டத்தில் வசித்து வருபவர் செபஸ்தியான். திருச்சி – திண்டுக்கல் தேசிய நெடுஞ்சாலை அருகே இவரது வீடு உள்ளது. நேற்று மாலை இவர் தனது ஒரு ஆட்டை புல்வெளியில் மேய்ச்சலுக்கு கட்டியிருந்தார்.

அப்போது ஒரு ஆட்டோவில் வந்த 3 பேர் ஆட்டை ஆட்டோவில் ஏற்றிக் கொண்டு தப்பி விட்டனர். இதை கண்ட செபஸ்தியான், அவரது மகன் ஜான்பிரிட்டோ பைக்கில் அவர்களை துரத்தினர்.
இதைக்கண்ட கடத்தல்காரர்கள் வந்த வழியிலேயே ஆட்டோவை திருப்பினர். அப்போது எதிரே பஸ் வந்ததால் நிலை தடுமாறி ஆட்டோ கவிழ்ந்தது.

அப்போது ஆட்டோவில் வந்த ஒரு நபர் பஸ்சில் ஏறி தப்பினார். 2 பேர் சிக்கினர். அவர்களை செபஸ்தியான் மற்றும் பொதுமக்கள் மடக்கி அங்கு வந்த பேட்ரோல் மற்றும் வையம்பட்டி போலீசாரிடம் ஒப்படைத்தனர். விசாரணையில் அவர்கள் திருச்சி உறையூர் நடராஜன் (35), மணிகண்டன்(36) என்பது தெரிய வந்தது.

இந்நிலையில் ஆடு திருடிய இடம் தங்கள் எல்லை இல்லை என வையம்பட்டி போலீசார் சொல்லி மணப்பாறை போலீஸ் ஸ்டேஷனுக்கு போலீசார் கொண்டு வந்தனர். அங்கு வந்த பின் மணப்பாறை போலீசார் சம்பவ இடம் தங்கள் எல்லை இல்லை என்றனர். அப்போது சாலையில் நடக்கும் சம்பவங்கள் மட்டுமே தங்களது கட்டுப்பாட்டில் வரும் சாலைக்கு வெளியே நடக்கும் சம்பவங்கள் மணப்பாறை கட்டுப்பாட்டில் வரும் என வையம்பட்டி போலீசார் தெரிவித்தனர்.

இதையடுத்து 4 மணி நேர அலைக்கழிப்பிற்குப்பின் ஒரு வழியாக வழக்கை மணப்பாறை போலீசார் ஏற்றுக் கொண்டனர்.

Leave a Reply