Categories
Featured அரசியல்

மாநிலங்களவை எம்பி பதவிக்கு மன்மோகன் சிங் மீண்டும் போட்டி…நாளை ராஜஸ்தானில் வேட்புமனு தாக்கல்

ஜெய்ப்பூர்: மாநிலங்களவை எம்பி பதவிக்காக முன்னாள் பிரதமர் மன்மோகன் சிங் நாளை ராஜஸ்தான் மாநிலத்தில் வேட்பு மனு தாக்கல் செய்ய உள்ளார். முன்னாள் பிரதமரும், காங்கிரஸ் மூத்த தலைவருமான மன்மோகன் சிங் (89), அசாம் மாநிலத்தில் இருந்து மாநிலங்களவை எம்பியாகத் தேர்வு செய்யப்பட்டிருந்தார். அவரது பதவிக்காலம் கடந்த ஜூன் மாதம் நிறைவடைந்தது. மீண்டும் அவரை எம்பியாக தேர்வு செய்ய கட்சி தலைமை முடிவு செய்துள்ளது. அதனால், ராஜஸ்தானில் காங்கிரஸ் ஆட்சி நடப்பதால், அம்மாநிலத்தில் இருந்து மாநிலங்களவை எம்பியாக ேதர்வு செய்ய முடிவு செய்யப்பட்டது. ஏற்கனவே எம்பியாக இருந்த பாஜ மாநிலத் தலைவர் மதன் லால் சைனி கடந்த ஜூன் மாதம் காலமானார்.
அவர் கடந்த ஆண்டுதான் மாநிலங்களவைக்குத் தேர்வு செய்யப்பட்டிருந்தார் என்பதால், அங்கு மாநிலங்களவைக்கு இடைத்தேர்தல் நடைபெறவுள்ளது. இந்த இடத்தில்தான் மன்மோகன் சிங் போட்டியிடுகிறார். அவர் நாளை (ஆக. 13) தனது வேட்புமனுவை தாக்கல் செய்ய இருப்பதாக காங்கிரஸ் வட்டாரங்கள் தெரிவித்துள்ளன. 200 உறுப்பினர்களைக் கொண்ட ராஜஸ்தான் சட்டப்பேரவையில் காங்கிரஸ் கட்சி 112 எம்எல்ஏக்களுடன் பெரும்பான்மை பலம் பெற்றுள்ளது. மேலும் பகுஜன் சமாஜ் மற்றும் சில சுயேச்சை எம்எல்ஏக்களும் அக்கட்சிக்கு ஆதரவளித்துள்ளனர். அதனால், மன்மோகன் சிங் வெற்றி பெறுவது உறுதியாகிவிட்டது. இவர் கடந்த 1991ம் ஆண்டு முதல் 2019ம் ஆண்டு வரை அசாமில் இருந்து தொடர்ந்து 5 முறை மாநிலங்களவைக்கு தேர்வு செய்யப்பட்டவர்; தொடர்ந்து இருமுறை பிரதமராக இருந்ததுடன், மத்திய அரசின் தலைமைப் பொருளாதார ஆலோசகர், ஆர்பிஐ கவர்னர், திட்டக்குழு துணைத் தலைவர், நிதியமைச்சர் என பல முக்கியப் பொறுப்புகளையும் வகித்துள்ளார் என்பது குறிப்பிடத்தக்கது.

Leave a Reply