Categories
Featured இந்தியா

தண்ணீர் பற்றாக்குறை தீர வாய்ப்பு: தமிழக அரசின் கோரிக்கையை ஏற்று ஸ்ரீஷைலம் அணையில் இருந்து தண்ணீர் திறந்தது ஆந்திர அரசு

ஐதராபாத்: தமிழக அரசின் கோரிக்கையை ஏற்று ஸ்ரீசைலம் அணையில் இருந்து ஆந்திர அரசு தண்ணீர் திறந்தது. தமிழகத்துக்கு கிருஷ்ணா நதி நீரை கூடுதலாக திறந்து விடும்படி ஆந்திர முதல்வர் ஜெகன்மோகன் ரெட்டியை நேற்று நேரில் சந்தித்து தமிழக அமைச்சர்கள் வேலுமணி, டி.ஜெயக்குமார் கோரிக்கை விடுத்தனர். பிறகு மாலை 4.30 மணிக்கு விஜயவாடாவில் இருந்து சென்னை வந்தனர். அப்போது, அமைச்சர் வேலுமணி நிருபர்களுக்கு அளித்த பேட்டி: முதலமைச்சர் எடப்பாடி பழனிசாமி உத்தரவின்பேரில் நாங்கள் ஆந்திர மாநிலம் சென்று அந்த மாநில முதலமைச்சர் ஜெகன்மோகன் ரெட்டியை சந்தித்தோம். நமக்கு தெலுங்கு கங்கா திட்டத்தில் தரவேண்டிய கிருஷ்ணா தண்ணீரை பெறுவதற்காக சென்றோம்.
முதலமைச்சர் எடப்பாடி கொடுத்த கடிதத்தை அவரிடம் கொடுத்து வேண்டுகோள் விடுத்தோம். இதற்கு முன்னால் தரவேண்டிய தண்ணீரை அவர்கள் வறட்சியை காரணம் காட்டி தரவில்லை.தற்போது ஸ்ரீசைலத்தில் நல்ல நீர்வரத்து இருக்கிறது. எனவே இப்போது அவர்கள் தண்ணீர் தர வாய்ப்புள்ளது. நாங்கள் அதை கேட்டதும் ஜெகன் மோகன் ரெட்டி தமிழகத்துக்கு தண்ணீர் கொடுக்க ஒப்புக்கொண்டுள்ளார். உடனடியாக ஸ்ரீசைலத்தில் இருந்து சோம சீலாவிற்கும் பிறகு சோமசீலாவில் இருந்து கண்டலேறு அணை மூலம் தண்ணீர்விட அதிகாரிகளை அழைத்து உத்தரவிட்டுள்ளார். சென்னைக்கு இருக்கும் தண்ணீர் பற்றாக்குறை பிரச்னையை வேகமாக தீர்க்க முடியும். ஏற்கனவே ஆந்திரா 4 டிஎம்சி தண்ணீர் பாக்கி வைத்துள்ளது. தற்போது இந்த ஆண்டு 4 டிஎம்சி என 8 டிஎம்சி தண்ணீர் தரவேண்டும். அந்த 8 டிஎம்சி தண்ணீரை தர ஜெகன்மோகன் ரெட்டி ஒத்துக்கொண்டார். இனிமேல் ஜூலை, அக்டோபருக்கான தண்ணீர் உடனே வந்து சேரும். இவ்வாறு அவர் கூறினார். இதற்கிடையே, ஆந்திர முதல்வர் ஜெகன்மோகன் ரெட்டியின் உத்தரவை தொடர்ந்து ஸ்ரீசைலம் அணையில் வினாடிக்கு 7,000 கன அடி நீர் தமிழகத்திற்கு திறக்கப்பட்டுள்ளது.

Leave a Reply